網友實戰分享：自己執灰噴油、修復泵把傷痕！

大家好！我今日同大家分享自己執灰噴油、修復泵把的經驗。首先係度多謝小u俾個機會同大家分享下同自己愛車既經歷同大家分享。係依度我先同大家介紹下自己先，我叫Jackie，牌齡差唔多兩年，但係我同絕大部分人一樣，考左牌既第一年係無諗過買車，直到甩p之後先開始物色人生中既第一架車。相信大家都想知我最終揀左咩車做我既第一架車，而佢就係……

無錯，佢就係TOYOTA ECHO。（但係點解會係佢？我之後會再另外再解釋。大家多D黎香港養車日誌哦！）

好，入正題啦！身為一個新牌仔又買左人生第一架車可以陪自己依度去果度去，但係始終一個對路面零經驗既新牌仔好多時都會唔多唔少都會因為無經驗而依度hi花果度撞花果度，令到架車增加唔少歲月痕跡。大家好多時都會當睇唔到，因為作為一個新牌仔，手車爛就係人都知，之但係對於我來講，始終唔太接受到泵把花左一達，於是就萌生左自己diy既念頭，亦做就左我今次既分享。首先，大家睇下下圖就係我架車未整之前既損傷：

再來就係我自己番噴之後既成果：

去到依度，唔知大家係唔係想知我係點做到？我地開始啦喎 ^_^

自己噴油需要準備的材料和功夫

首先，材料列表如下：

• 畢地一罐：英文叫Putty，用於填平碰撞刮痕的凹凸傷痕至平順，俗稱“執灰”。
• 底灰、色漆光油、力架各一罐（如下圖）：底灰叫Primer，用於提供光滑的表面比色漆，極重要，噴得唔好以後會“pok”；色漆叫Paint，就是顏色；力架叫Clear Coat，提供保護和令身的效果。如果用完成後的厚度排序，Putty > Primer > Clear Coat > Paint。新手常見誤區喺打算用色漆去填平凹凸，其實喺沒可能的。
• 幾張2000號水磨沙紙用來完成噴油之後磨番平表面（但如果執灰前刮痕凹凸比較嚴重，買400、800、1200將表面磨平先，會慳好多功夫）

材料哪裡購買？

畢地同沙紙就可以去五金舖買啦，但係底灰，光油，力架就要去黑布街買。而你去之前就要先搵下車身既顏色代碼（Colour Code）然後去配番岩既顏色，好似以我果架TOYOTA來講，車身會有個鐵牌仔打曬底盤資料同車身顏色:下圖圈住黃色就係我架車既色碼。如果大家真係唔肯定個顏色係咩號碼，最快既方法當然係成架車渣落去搵舖頭幫手配，如果唔係既大家可以去GOOGLE睇睇自己的車廠在哪裡標示顏色代碼。通常日系車的顏色最容易搵到。

當你買齊曬所有材料之後其實就可以開始diy啦！我哋繼續詳細講解翻噴的每一步，保證你自己都做到！

 

萬事俱備：DIY噴油實戰！

1、準備功夫

首先，由於我係泊係露天停車場，亦即係所謂既爛地，所以只係需要搵一個唔會影響到人既位置就可以開工，如果大家泊係一啲室內停車場既話就一定要問番停車場管理處俾唔俾先好開始。

開始既時候就當然係係你要施工即範圍舖好啲報紙避免整污糟其他唔需要施工既地方啦：

（請按下邊的下一頁 “2” 繼續）

 

2、打磨、執灰

之後，就係用二千號既水磨沙紙濕水慢慢磨平你要施工既區域。要記住，依個部驟一定唔可以快，同埋要有耐性，甩左油既位一定要磨到同周圍既漆面摸落去唔會有高低不平既感覺。

磨平之後之後就要在甩左油（見到底漆、底膠）既位置抆啲畢地上去、如下圖：

但係大家要注意，畢地係要用佢內附果枝硬化劑混合左之後抆上去你要修補既位置佢先會硬化既。混合既比例大約就係一湯匙既畢地加一粒青豆咁多既硬化劑，因為你加得多硬化劑會加速佢乾同硬化既速度，咁你就好難去抆上去同塑型。（具體混合比例請參考你買的噴漆說明書）

當你混合好畢地之後就要盡快抆上去，你就要用佢內附既膠片去抆。我個人意見就係每次唔好抆咁多，每次逐少咁抆，因為當佢乾左之後你要磨番平，如果你一次抆好多上去你就要浪費好多時間去整番平同滑。

係抆左上去之後你就係要等佢乾，咁我當時就係等兩至三個鐘乾，因為我目標係一日內整好佢，如果大家有時間其實放一晚等佢乾透先去下一步會更好。

咁大約兩至三個鐘頭乾左之後要做既就係磨番平去。咁要用到既當然就係我之前講既二千號水磨沙紙。依個步驟切記唔好心急，每次磨既時候都要摸下個表面，一定要磨到同其他位置唔會有突起既感覺。

 

3、噴漆開始：底漆（Primer）

當你成功磨到佢好光滑兼且無突起既話就可以去下一步：上底油！

係上底油之前，一定要用洗潔精淨洗乾淨施工位置同抹乾，之後再用酒精抹，一來可以令到施工位置易上色，二來酒精亦有少少等佢無水份。

再來係施工位置用百潔布磨下佢，等之後上底油既時候啲油容易癡實施工位置表面。

跟住我地就可以開始上底油，要上三層，上每一層要隔五分鐘以便等之前果層乾（具體時間請參考你買的噴漆說明書）。，完成之後又係要等一個鐘等上果三層乾。

當底油乾左之後要做既又係要磨番滑，都係用番二千號水磨沙紙就ok。咁又係磨到摸落去唔“鞋”就ok。

 

4、最後噴光油色漆（Paint）、力架（Clear Coat）

咁之後就當然要上番我地表面車身顏色既光油啦。方法同我地上底油一樣，就好似下圖咁都係上三層，而每層之間都必須要隔5分鐘。同樣地，都係要等一個鐘左右等佢乾。

最後,我地就係要上力架，目的都係要保護番我地噴既油唔好咁快再褪色，而步驟都係同上面既底油同光油做法一樣。

咁樣基本上就完成架啦。之不過我地最好都係要等廿四小時先，點解？因為我地完成左之後好多時都會無原裝油咁〝令〞身，咁我地就係要用番粗蠟去打番〝令〞佢，而我既經驗係起碼要打兩至三次左右先會開始有番原裝油咁〝令〞。

最後成品

最後既成品就係咁:

咁我既分享大致上就去到依度，如果大家反應好既我會再開多一篇再詳細講下大家番噴既時候遇到既一D注意位，謝謝。

 

小U結語：多謝Jackie的精心分享，碼子配圖花費了超過三星期時間！大家才有緣見到本文分享。DIY不僅僅是慳錢咁簡單，從分析問題的過程、尋找方法的樂趣、買料的樂趣、到自己落手做的樂趣、欣賞自己成果的樂趣、分享DIY快樂的樂趣，這些所有都是比錢人做買不回來的。用錢只能買到方便，而買不到樂趣。相信Jackie對此是深有體會，香港養車日誌也會繼續為各位車主打開大門，歡迎你來分享屬於你的養車快樂：

自己動手整車系列：零基礎沒問題！新手學做汽車保養維修

用雙手修復車身蜘蛛太陽紋！不依賴電工具的手工拋光研磨法

重磅：年度最強性價比車CAM：內置GPS、1440P安霸A12 $6xx 凌度BlackView