Home 新車主 網友分享:駕駛日常、維修保...

網友分享:駕駛日常、維修保養的小小心得

Shoulder Check

(本文由Alex Fok創作分享)今次想同大家分享下一D駕駛、保養維修既心得,不過,以下內容真係我自己既心得,純粹分享下俾大家討論下咁,如果各位朋友認為呢D小小心得係ok既想自己試下,咁就要自行評估風險啦,小弟唔會負上任何責任架,特別係關乎維修果方面。

駕駛方面:如何輕鬆又安全

Shoulder Check

1.Shoulder check:即係過線、入線擰頭睇盲點有無車,我個人覺得呢個動作真係、真係、真係好重要,好多意外既發生,都係無睇清楚(甚至無睇)盲點有無車就衝出去,咁就出事架啦。

廣告:盲點鏡幫你睇清車後死角,詳情請點擊 ↓

十大必買的車品一次看完!你有齊了嗎?

2.「STOP停」路口停車:大概都係入線、小路出…等等,前面路口可能車速好高,可能有阻檔要停低睇清楚,又可能係出路口右轉、無燈位、橫跨來回線等,我個人認為呢D路口真係比較高危。

3.轉線轉彎打燈:其實指揮燈係俾其他路道使用者知道你想點,一個咁簡單既動作,既簡單又重要,點會唔做呀。cut線要打燈,cut完比個雙閃 “Thank You” 燈就最like啦:巴士切線後打死火燈 網民︰唔識會嚇親!

4.如果駕駛中覺得有少少眼訓,熄冷氣開窗會好好多。

 

日常用車:兩個心得分享

1.入油時我會係側鏡睇住,因為試過兩個經驗,第一,唔知係咪枝油槍有問題,明明入完油彈埋槍,油站員工拎番枝油槍出黎時,有一啖油漏左出黎,我見到就拿拿聲叫佢抹番佢,否則有可能「拿」傷車身蠟面甚至車漆。另一次就係,入完油、拎走油槍、拎單俾我、跟住講「多謝晒」。多謝晒?未擰番埋個油箱蓋喎師兄!所以,入油都係睇住下好。

Gas Cap

2.有一段時間我要泊爛地場,總有幾棵大樹係附近既,而且總係落葉落得幾勁下喎,次次係頭蓋水撥位執番出黎都幾煩,所以如果我唔用車一段時間的話,我會用一條大毛巾卷成長條型,擺係水撥位果度,擋到幾多得幾多。

 

保養維修:享受DIY的樂趣

1.熱車洗車時,我唔會即刻洗胎鈴先,亦都唔會特登向車頭散熱水箱沖水,因為冷縮熱脹既關係,迫力碟同水箱咁熱,一野就沖D凍水落去,唔多唔少都會有影響既,我會慢慢洗晒車身先,再慢慢洗佢地(咁我又唔係話洗緊車果時滴水不沾既)。

2.每星期會睇一次偈油、水箱水、軑油、胎氣。

3.我唔會落任何偈油精落引擎度。

4.汽油添加劑我就會用通油路果D,坊間有好多車友話無用架,用左都無分別……,我用左咁多年,反而覺得係有用既,為左真正發揮到添加劑既效用,大前提下我會注意兩點:

汽油添加劑有用嗎?香港車主需要加邊一種?(付答案)

  • 坊間好多車友就係落一枝再加滿油咁用,我就會按樽身說明正確使用量,點解?例如:某枝添加劑寫明,每枝可用於45公升汽油,我估某d日本車仔既油缸都可能係40公升左右,咁落一枝再加滿油都差不多既,但係以我車65公升油缸為例,如果照一枝加滿油,添加劑就唔夠,咁就唔能夠充份發揮佢既效用,(我會由著油燈計入$600油加一枝添加劑)所以,我估車友們對添加劑既負評應該係黎自呢個原因。
  • 當呢缸落左添加劑既油用完,再去入油後,我會將車用電腦reset番,或者清除自適應值,等車電腦重新學習,因為呢缸油將d油路、噴嘴等清得咁上下,咁電腦會自己調較過空燃比,當下缸油無再加添加劑啦,個空燃比應該會唔同左,所以用電腦reset番,架車會唔同晒。

Reset行車電腦的方法:

著咗引擎燈點辦?利用手機APP和藍牙OBDII一百蚊唔洗找到問題!

 

5.清洗空氣流量計(Mass Air Flow Meter),坊間都有好多車友講:自己洗會好容易整壞佢架、一洗就壞架啦、想俾錢換個新既你就洗啦……眾說紛紜,但係我每次換偈油、油隔同風隔後,我都會洗一次個空氣流量計,so far無問題喎,不過都係果句,我會注意以下幾點:

  • 洗任何野都好,我都會攤番凍先洗。另外要拔走插頭先好洗
  • 一定要買專用清潔劑(坊間我只會買一隻C字頭C字尾出既MAF Sensor Cleaner),千萬唔好用其他咩電子零件清潔劑、白電油、天拿水、W咩40……咁,用呢D多數洗完就會壞。(呢點相信係車友對洗MAF負評既其中一個原因)
  • 記住,MAF係好脆弱既野,所以唔好用手或者其他野接觸入邊既零件,一掂即出事,一定會,唔會唔會。
  • 清潔劑係壓縮氣黎既,好多車友會長按住係咁噴入去,咁就大錯特錯啦,C字頭C字尾官網都有教,唔係長噴,而係一下一下咁噴,仲要係離開4至5寸咁噴,相信係避免高壓既清潔劑吹壞個零件。(呢點亦可能係車友對洗MAF負評既另一個原因)。
  • 洗完後一定要乾晒先好裝番上去。
  • 最後都係用電腦reset或者清除自適應。

距哋官網噶介紹影片:

小U結語

多謝Alex的又一力作!好開心有你的參與,我覺得一個人的心得經驗,如果可以分享給3個人、對他們有幫助,這3個人每人又分享給3個人,那就有9個人有得著。如果每次這樣傳播需要1個月,10個月之後就有59,049個人得到幫助。希望我們的一同努力,可以成為星星之火。

如果你也有興趣分享你養車過程中的樂趣、經驗、心得,請立即參與到香港養車日誌分享計劃吧:

分享你的養車樂趣!一嘗做KOL Blogger、仲有錢賺!

LEAVE A REPLY

Please enter your comment!
Please enter your name here