Home 新車主 最全圖文教程:港珠澳大橋澳...

最全圖文教程:港珠澳大橋澳門口岸轉乘計劃 – 從申請到上路!

SHARE

“港珠澳大橋澳門口岸轉乘計劃”

關於呢個題目,坊間已經有好多文章、youtube分享左,不過就多數係分享點樣申請,跟住就分享一段歷時30至45分鐘既車程片。

我估實會有朋友問:你呢編同佢地有咩分別呀?

我呢編分享主要係講申請時要留意既野啦,到申請成功啦,出發前既預備功夫,最後就係我一段簡簡單單剪輯成19分鐘既車程片。

事不宜遲,Go、Go、Go……

第一步:向運輸署申請

首先,申請既方法唔多講啦,大家可以上運輸署網頁睇睇,唔難搵既。

光陰似箭,日月如梳,大概3星期內,就會收到運輸署既申請結果,同埋會寄兩樣文件俾你:一張封閉道路通行許可證(禁區紙),同埋一張澳門發出既停車場許可證。大陸果邊既許可無咁快批,等住黎做跟住既野先啦。(直至到呢一步,你用既費用係運輸署收既費用,保險就稍後會講)

第二步:港珠澳車保保險點樣買?

講開又講,除非有好特殊、好特殊、好特殊既原因啦,個申請應該唔會話唔批既。
所以,申請後等回覆期間,就要開始搵保險啦。
港珠澳大橋來往港澳係比較特別既,要齊中港澳既車保,因為:
香港:香港車要有香港車保好正常呀,唔多講啦。
澳門:因為要進入澳門口岸既停車場,要埋澳門車保都正常呀。
大陸:呢樣可能會有朋友奇怪,我都唔係去大陸,做乜要大陸車保?唔好意思,真係要架,因為大橋所經過既係大陸水域。

香港保險業聯會話就話有經間保險公司可以做齊三地保險,但係我申請時問過幾間,其實澳門果份都唔係佢出(澳門好似得兩三間,其中一間係中資銀行,其餘就係當地保險公司),所以,就算你真係搵保險業聯會講果幾間,都只不過係中間人。

有見及此,我索性搵我用既保險Agent公司問,一來諗住係現有客戶,會跟進得好D既(或者係心理因素,感覺自我良好D咁),二來諗住會平DD呱。

點知……到報價番黎,Agent價同大行既價,相差唔夠100蚊。

因為,大陸既「機動車交通事故責任強制保險」又簡稱「交強保」係硬掘950人仔一年(題外話:咁平咁易買,唔怪之得大陸咁多車、咁多車手啦)
而澳門果份,係唔會計香港既NCB,就算係香港有30年駕駛年資都好,第一次係澳門出車保,都係一個「新牌仔」,所以,我果份就要2850 MOP一年。搵齊報價,決定買啦,就當然要俾錢啦,澳門果份付款方法有兩種:一係經
Agent,一係直接入澳門保險公司香港既銀行戶口,入數紙都係交番俾Agent,唔
難呀。


到大陸交強保啦,當我收到報價同付款單之後,真係暈得一陣陣,因為……要
用保單申請人既大陸銀行賬戶交費!用公司戶口?No Way!叫朋友戶口代交?No
Way x2。
咁點算?開戶口囉。(由於呢編關於車既分享,所以開戶既內容就唔多講啦,
網上好多「港人大陸開戶DIY」呢類分享,可以自己搵搵)


所以,係度提提大家,保險呢一part真係唔好急,第一:搵保險Agent幫你搞;第
二:最好搞掂左大陸果份先,萬一開戶有阻滯,或者直頭開唔到戶口,都唔洗
煩澳門果邊,如果澳門交晒錢先話搞唔到大陸保險,就煩死囉。

第三步:出臨時牌照

黎到呢度,搞掂晒三地保險,相信大陸果邊既許可都批出埋啦。你會收到電郵通
知,之後就上傳保險既資料上去,你會收到車既臨時牌同人既臨時牌啦,自己
印佢出黎就得架啦。

萬事俱備:港珠澳我黎啦!

到出發啦,要點做?
最遲12小時前要預約停車場,10:00至22:00為一個時段,同埋22:00至翌日10:00為一個時段,每個時段180 MOP。
檢查車輛:胎氣啦、入定油啦、五油三水啦……因為中途無油站,有乜故障就煩啦,聽聞拖車費$10000起跳。
帶定件外套:想吹吹風?真係幾涼下架,唔係講笑
開車前咪飲:「酒」就一定開車前咪飲啦,「其他飲品」都係開車前咪飲…咁多,點解?因為全程係無廁所既。
電話數據卡:用張中港澳既好D,因為係大橋水域只收到大陸台,一入到澳門口岸就澳門訊號
至於文件,就一張圖俾你睇晒:

我就會咁樣整定呢疊文件,要貼既就貼係擋風玻璃,其他就要跟車,有需要先俾有關人員睇。

最後,全程真係唔好超速,值得留意既係大陸段既「間距測速」,無揸開大陸車既,可能未必知會留意係乜,「間距測速」顧名思意係用距離黎測車速,當車輛經過起點會被影一張相,到終點(好似係2x公里後)再影一張,就再用呢段距離用左幾多時間黎計,如果快過所定既時間就假定你超速啦。所以都係唔好諗住走一段快既,之後慢番就得囉,如果真係咁,尾段就真係要烏龜咁慢先得啦。

而家出發睇片啦:

安全駕駛,祝旅途愉快

小U結語:再次感謝ALEX的經驗分享!適逢響小U忙到甩轆、無法更新網站的日子,有ALEX的用心整理和分享,讓各位香港車友又有更多新鮮嘢玩。總結一下Alex親身嘗試的DIY申請費用,以及蘋果總結的費用相約,初期投資約4000港幣:

有多幾個人一齊分享,呢幾千蚊的體驗和方便就值翻啦!

如果大家有自己的經驗心得,小U鼓勵大家分享給香港的其他車友(還有“稿費”呢!),一個人的快樂變成好多人的快樂。香港養車日誌也會繼續為各位車主打開大門,歡迎你來分享屬於你的養車樂趣:

SHARE

LEAVE A REPLY

Please enter your comment!
Please enter your name here